كل الدروب

كل الدروب ......
* * *
الله من عذاب الريدة
الله من جحيمها وهولها
الله من شجونها ونارها
وكتين تشتعل فوق زولها
يتحلف يقول التوبة
تاني أنا أهوى ما معقولة
لكن فجأة ينسى القالو
يرجع تاني يسقي شتولها
يا قلبي الحزين وين تمشي ليه كل الدروب مقفولة
كيفن زول يصل للجامعة يرجع تاني لي سنة أولى
* * *
ياما كتار حليلهم ضاعوا في زحمة دروب مجهولا
يزرعو في النوايا الطيبة كان ثمرة ضياع محصولا
الواحد يريد النجمة ما بيقبل يشوفو افولا
تلقى وسط ظروفو يشابي عشمان انو بكرة يطولا
* * *
مسكين كان يخادع نفسو بي سحب الخريف وهطولا
متعشم يقول المسرة يوم باكر يدقو طبولا
مسكين ياحليلو اتناسى نكبات الزمان وفصولا
واتناسى انو نحن غلابا احلامنا العراض مطبولا
* * *
من زمن القراية شراي ما بشوف غير سيوف مسلولا
كل ما اقول وصل لي مرسى القى احزاني شادى خيولا
قاسي الزي يقلى الداريو نقاي يعرف المصقولا
اول ما يقول ديك لي كل خلق الله بكرة يجولا
* * *
عايش فد سؤال جواي ليه لحظات فرحنا عجولا
وايام الحزن تندب زي السلحافية مهولا
اختلطت على ايامي قدامي الهموم مسدولا
ممشكلتي العلي ومالبي ما هو مرض دوا وكبسولا
اه اه اه اه اه اه اه
* * *
اه من دنيتي واقدارا اه من جحيما وهولا
شينا الزي بلقى الدايرو منو الدمعة ما مقبولا
لكن يا رفاق بالدغري كلمات بي صراحة بقولا
انا كان جنيت او ودرت تبقى ظروفي هي المسئولة

* * *

يسلموووووووا ايديك
يا بت السودان
ننتظر مزيدك ياقمر

مرسى احاسيس كتير رائعة

مروران حبيبي
وست البنات
احمد الله اني لقت لغه انا افهمها وانتوا لا
ههههههههههههههههههههههههه
بنت بلدي الثاني
لا سلام منك وما منك تحيه
للوري خليته عايش في الاسيه
ما حرام يا الفنجري ما تسيب وصيه
كنت زي طيرا غريب سافر عشيه
كنت مكدب كنت ناسي
دابوا صدقت المفارق عيونوا قويه
تقبلي مروري
احمد

يسلمو بت السودان على المفردات الرائعه

كلماتك فعلا روووعة يا بنت بلادي
وينك من زمان مستنية زول من بلدي
جيتي انتي يا زولة
"عصفورة"

ماشاء الله الكل فاهمين وانا الوحيدة الي مو فاهمة

تسلمي حبيبتي لكن في اشياء مافهمتها بسبب اختلاف اللهجات
تقبل مروري