سبع عيون

سبع عيون

تطشرني أبعتابك ... وأختنك بالهم .. وألم طشاري بيدي .. وأرضة بعتابك
وأرش جرحي ملح .. من همسة اضنوني .. ويفز بي غريب .. يناغي عطابك
وأخيط بالجفن .. كل سهر الامايات .. أهز مفطوم حزني بلجمة صوابك ..
وأبات أعلة الجمر تنور .. أدك صبري كحل لعيوني بغيابك ..
وأضحك من جذب .. بس مستحي من الروح .. من عيني الخذلها الشوف بكتابك
واخص بيك حتى الاَخ .. أصيح أفيش .. من يلسعني تيزابك ...
وأستنكف اذا بالشين .. مر طاريك .. اشك زيك الصبر .. وأزهك ..
واذب روحي جتيل .. أبحلك محرابك ..
وألفلفها السنين العسمت بالخوف ... اكش عنها الصليل الغفة أمنسبابك ..
يناس تمرعدت من صدك .. ذلها اللوم بيك .. وناس شبعت نوم
ماهمها الطحير .. بنشغة احبابك ..
وأنه كبالك ربيع .. وبردك سوادين .. كصكصني بكشيطة .. الحدة نيابك
جنت ململ الك .. وأتكابح أوية الكيظ ..
وانت بعز شتاي .. اتصب علي بجحيل مرزابك ..
وجنت وياك .. كلي وياك .. واحد وانجسم نصين ..
اذا بطران خلة الداب من دابك ..
واتعريت . واجيك بلبة جويريد .. أكص من جلدي .. وانطي لعازة ثيابك ..
يبسمار الحزن بالروح ألك دكيت .. حد ماحوفرتها .. وضعف جلابك
وتوجيت اعله ضلعي .. وما كلت أحا .. نفضت ايديك شجاك .. انكرت لصحابك ..
وشجاك ..أمحورب أعلة الناس بحرابك ..
وشجاني اصلبت روحي أبصبخة اترابك ..
شجاني عميت حد ماتاه كلشي .. بروجة احسابك ..
شجاني اتخلمصت مدري .. وعفت ناسي .. ومشيت اشكد مشيت . وياك لحسابك
شجاني وسوربت عيني ..وعفت وكر الصكور .. اركض وره اغرابك ..
ضنيتك نبع غيره.. وعمد للمستحة .. والمستحة يهابك ..
جزاتي بوجهي تجفي الغيظ .. ؟؟ ماكفاك ظهري ..لكوز نشابك.. ؟؟
ماكفاك .. حفنة سنين ... سبع عيون .. عمري أملولح أبابك ....؟؟

أتقدم بالشكر الجزيل لمن تجشم عناء التعب ونشر هذه القصيدة لكن اود اعلامكم بان هذه القصيدة تعود لي انا صديقكم مؤيد خليل العطار / رئيس خيمة الشعراء الشعبيين في مدينة الكوفة , مع خالص التقدير.
00964-07801527226
او
اسيا
00964-07708010839