بتقــــــــــول انـــــــــــــــــك بتحـــــــــــــــــــــبني !!

نونه كاري · 05-05-2006, 11:59 AM

كل بنت بتحب.... بتشتكي من كتر المشاكل والخلافات بينها وبين حبيبها
فا سواء
اتعرفتم في الشغل، في الجامعة، ولاّ حتى في إطار الأسرة، حسيتِ بإعجابه واهتمامه، بدأ (يجر كلام) ويحاول يقرب منك، وإنت من ناحيتك حاسة بميل ليه مع شوية استلطاف.

تتعاملي ازاي مع اهتمامه ده..؟!

إيه اللي المفروض يحصل علشان تعرفي إن اهتمامه بيكِ (حقيقي) وإنه عايزك فعلا تكملي معاه مشوار الحياة...؟!

تتأكدي ازاي إنك مش مجرد (واحدة) في حياته، يعني مش عايز يتسلى ولا معتبر إنك مرحلة وتعدي...؟!

يا ترى إيه اللي حصل؟ يا ترى لسه بيحبني؟ يا ترى لسه عايز يشوفني؟ يا ترى إيه اللي غيره؟
1000 يا ترى و2000 علامة استفهام قعدت "انت" تفكر في إجابة عليهم بعد لما كلمت "حبيبك" في التليفون... كان بقاله يومين ماكلمكيش... وحشهك قوي فراحتي مكلماه علشان تطمئني عليه ودار بينكم الحوار ده:
"انت": ازيك يا أيمن؟
"هو": كويس.
"انت": ليه ماكلمتنيش بقالك يومين... فيه حاجة مزعلاك؟
"هو": لأ مافيش حاجة
"انت": يعني إنت كويس؟
"هو": أيوه.
"انت": طيب سلام.

لاحظوا قد إيه الحوار بارد و"هو" قد إيه ماكانش متفاعل معاكي وانتي اللي عمّالة تسألي وهو يا دوب بيرد بالعافية وكمان مش على كل الأسئلة وشوية شوية هيقفل التليفون في وشهك.

تعرفوا ده حصل ليه؟
لأن "انتي" استعجلتي وكلمتيه وانتي ماتعرفيش ظروفه إيه.. كان نايم ولاّ تعبان ولاّ عنده شغل ولاّ إيه..!!
وكانت النتيجة إنه رد عليكي ببرود لأنه مش مستعد إنه يتكلم معاهكي فكان طبعا أول تفكير فكرتي فيه إنه مابقاش يحبك ويمكن كمان تكوني فكرتي إنه في الوقت ده كان مع واحدة تانية...!!

هنا "انتي" غلطتي.... انتي صحيح كلمتيه علشان قلقتي عليه وكانتي عايزة تطمئني... لكن..

غلطك إنك ماصبرتيش واستنيتي إن "هو" يكلمك ويبررلك سر غيابه

والسؤال هنا: ليه المفروض كانتي تستنى إنه هو اللي يسأل وإنه اللي يتكلم؟

والإجابة:
لأنهك لما تستنى إنه هو اللي يكلمك هيكلمك وهو مشتاق ليكي وعايز يكلمك فعلا وهيختار الوقت اللي هو عايز يتكلم فيه ويكون جاهز فعلا إنه يتكلم ومحضر اللي هيقوله وساعتها شكل الحوار هيختلف تماما.

اتعذبي واحتاري واسهري لكن اوعي تتكلمي ..........

مهما كان واحشك ومهما كنتِ عايزة تسمعي صوته ومهما كنتِ بتحبيه استنيه لما هو اللي يتصل بيكِ ده أفضل ليكِ وكمان ليه.

وده زي اللي حصل مع "إيمان"..

فـ"أحمد" قعد أسبوع كامل مايكلمش "إيمان" ولا يفكر يطمنها عليه رغم إنه قبل كده كان بيتلكك ويتكلم في التليفون ويسألها عن حاجات كتير فهم زمايل في الشغل وكمان جيران وشايفاه في الرايحة والجاية....
طبعا "إيمان" اتجننت.. كانت عايزة تعرف إيه اللي مغيّره وإيه اللي حصل... هتموت وتكلمه لكن مكسوفة وخايفة يحرجها.... عايزة تعرف إيه اللي متضايقة؟ ويا ترى لسه بيحبها ولاّ ناسيها؟ ولاّ هو عمره ما فكر فيها بجد وكانت بالنسبة له مرحلة وعدت؟!

اتعذبت كتير... واحتارت كتير.... وسهرت كتير لحد لما في الآخر التليفون رن وكان هو اللي بيتكلم:
"أحمد": ازيك يا إيمان.
"إيمان": الحمد لله.
"أحمد": وحشتيني.
"إيمان": .............
"أحمد": سكتِ ليه؟
"إيمان": ...........
"أحمد": أنا عارف إنك زعلانة مني، وإني مقصر في حقك، لكن غصب عني والله كان عندي مشاكل كتير قوي وماكنتش عايز أشغلك معايا.
"إيمان": طب والمشاكل دي انتهت؟
"أحمد": لأ لسه شوية بس ماقدرتش ماسمعش صوتك الفترة دي كلها وقلت بلاش أظلمك معايا وأحيرك و.......

ملاحظين شكل الحوار مختلف ازاي، ملاحظين إن "أحمد" هو اللي قعد يتكلم وإنه قال كل اللي عنده وإيه سبب بعده وتغييره من غير ما "إيمان" تتكلم ولا تسأل سؤال.

ملاحظين كمان حاجة أهم إنه ماسألهاش ليه ماكلمتهوش علشان تطمن عليه...!!

والجزء ده مهم جدا لأن البنت بتخاف إن عدم سؤالها ده يتفسر على إنه قلة ذوق أو عدم اهتمام بمشاعر الإنسان اللي المفروض إنها بتحبه وإنه مش فارق معاها كتير إنه يكون كويس أو مش كويس... يكلمها أو مايكلمهاش. لكن طبعا بيكون العكس هو الصحيح والبنت بتكون مهتمة إنها تعرف أخبار حبيبها وتسأل عليه لكنها من ناحية تانية لازم تعرف الوقت المناسب لده.. وده مش سهل في معظم الأحوال علشان كده لازم تديله فرصة يفكر ويختار هو الوقت المناسب اللي هو عايز يتكلم فيه وده علشان ماتضغطش عليه وكمان علشان تتجنب أي رد فعل يضايقها أو يجرحها.

والسؤال هنا: افرض كان غياب "أحمد" ده لأنه (عيان) مثلا أو -لا قدر الله- حصلت له حاجة وحشة، "إيمان" هنا مش كانت المفروض تسأل عليه؟

والإجابة:
علشان "إيمان" تطمن ممكن تحاول تسأل عليه من بعيد لبعيد وما دامت اطمنت يبقى تعرف إن بعده ده (في إيده) وبإرادته وتستنى إنه هو اللي يتكلم ويفسر لها سبب بعده وغيابه، يعني تدي له فرصة يكلمها وهو المفروض يقدر ده ويقدر عدم إلحاحها عليه ومايزعلش من عدم سؤالها... ده لو فعلا بيحبها.

لازم يكون هو الأقوى

وفيه سؤال أكيد هيدور في ذهن كتير من البنات وبرضه الولاد وهو: ليه الولد هو اللي مفروض يتكلم؟ هو مش إنسان وليه برضه مشاعر وأحاسيس وعايز يحس باهتمام اللي حواليه وخصوصا حبيبته وطالما بيحبوا بعض يبقى مفيش فرق بينهم وأي حد يسأل عن التاني...؟!

والإجابة ببساطة:
لأن الولد لازم يكون هو الطرف الأقوى في العلاقة بينه وبين البنت اللي بيحبها... هو اللي ياخد القرار في إن يكون بينهم حاجة وإنها تكمل وتتم... وهو اللي يحاول تنفيذ القرار اللي هياخده وعلى قدر إصراره على التنفيذ وعلى قدر تصميمه على إنه يحقق هدفه ويوصل لقلب البنت اللي بيحبها ويخليها هي كمان تحبه على قدر ما يكون حبه ليها وتمسكه بيها ورغبته إنه يقضي معاها باقي العمر وماتكونش مجرد حاجة يتسلى بيها وخلاص...!!

وكمان ده بيخليها تشعر بالأمان أكتر معاه لأنه هو اللي قرر إنه يبدأ العلاقة بينهم وكان هو المتحكم الأساسي فيها والخيوط كلها في إيده يعني ماحصلش ضغط عليه منها بالعكس كانت كل حاجة بإرادته وبرغبته....!!

مش معنى كده إنك هتكوني طرف سلبي تماما لكن خلّي الفعل من عنده أما رد الفعل من عندك إنت فرد فعلك على اهتمامه هو اللي هيحدد شكل العلاقة بينكم.

شجعيه بس..... بالراحة

ازاي تتعاملي معاه لو حسيتِ بتردده في التعبير بصراحة عن مشاعره ناحيتك...؟!

ازاي تأسسي لعلاقتكم (صح) ومن الأول علشان الحياة إن شاء الله تكون سعيدة خصوصا إننا بنتكلم عن علاقة رسمية وارتباط جاد مش حاجة مؤقتة ولا مستخبية...؟!

اتمني يكون عجبكم

اختـــــــــــــــــــــــــــــــــكم
نـــونـــه $ كــــــاري

a7la_ruru · 05-05-2006, 01:32 PM

مشكورة اختي على الموضوع يلي واضح انه قصص من الواقع واعتقد انه كل شاب وبنت الا ما يكون خطر على باله التساؤلات التي طرحتيها او مر بتجربة شبيهة وبالتأكيد لا يمكن ان نضع قاعدة ونسير كلنا عليها لانه طبيعة العلاقات وكيفية التعامل بتختلف كمان حسب اطراف العلاقة..... ومو شرط يكون الشاب هو الطرف الاقوى!!

على كل حال يسلموا على الطرح السلس لكن انا عندي ملاحظة بتمنى كل موضوع يأخذ عنوان مستقل لانه انا اعتقدت انك مكررة الموضوع نفسه اكثر من مرة.

مشكووورة عزيزتي وننتظر مزيدك