شوف الدنيا كيف ماشية.. معلش موضوع شوي طويل بس مهم

من نعم الله سبحانه و تعالى علينا.. انه خلق الكون.. و حطله قوانين ثابتة تحكمه..سنن كونية ثابتة.. زي الجاذبية و الليل و النهار و الشروق و الغرب.. دي سنن كونية في الطبيعة..
و عشان تستشعر قد ايه الثبات ده نعمة.. تخيل ابسط مثال.. ان لو درجة غليان المية مش ثابتة .. كنت عشان تعمل لك كوباية شاي مثلا.. ماتبقاش عارف هاتحتاج وقت قد إيه.. كل مرة بظروفها.. مرة المية تغلي عند درجة 10.. و مرة عند 200.. و مرة تغلي في درجة حرارة الغرفة.. يعني هي نازلة من الحنفية بتغلي لوحدها أصلا
و تخيل لو الشمس كل يوم بتشرق .. بظروفها.. مافيش نظام بيحكمها.. يوم تشرق الساعة 4.. و تاني يوم تشرق الساعة 10.. و يوم ماتغربش اساسا..
و قيس على كده كتير... عشانتعرف عظمة هذه النعمة.. نعمة ثبات سنن الله في الكون..
اللي ناس كتير مايعرفوهوش.. ان ربنا سبحانه و تعالى.. زي ماله قوانين ثابته في الطبيعة.. له قوانين ثابتة في المجتمعات.. و النفوس..
طيب نستفيد ايه من ده؟..
انا في الطبيعة.. لما عرفت درجةغليان المية مثلا.. قدرت مثلا و ده ابسط شئ.. أحسب انا محتاج وقت قد ايه الصبح عشان اعمل لي فنجان قهوة قبل ما اروح الشغل.. و عرفت انا هاصحى الساعة كم لأني عارف الشمس بتشرق الساعة كم..
كذلك في المجتمعات.. و النفوس.. عشان نقدر نعيش.. و عشان نقدر ننجح في حياتنا.. محتاجين اننا نعرف السنن و القوانين اللي بتحكمنا.. و نمشي معاها. في اتجاهها. و نستفيد منها.. لأنها زي ماقلنا قوانين ثابتة.. و اللي بيحاول يخالفها .. ببساطة عامل زي اللي واقف على شريط قطر.. و القطر جاي عليه و متخيل انه هايقدر يوقفه.. لكن اللي بيحصل.. ان القطر بيدوسه. و بيكمل..
كذلك سنن الله سبحانه وتعالى..
هاتقول لي .. كلام جميل و منطقي.. و كلنا عارفينه.. طب ايه الجديد؟..
اقولك هنا المشكلة.. اننا بالرغم من اننا عارفين الكلام ده.. مابنطبقوش..
و تعالى اضربلك أمثلة.. من المشاكل البسيطة اللي بتقابلنا في حياتنا في ايامنا دي..
القلق.. و عدم الشعور بالأمن و الاستقرار : و دي مشكلة بيعاني منها ناس كتير جدا في زماننا ده.. لدرجة ان الناس بقوا يفتكروا ان ده العادي.. و ده الطبيعي.. احساس بالقلق.. و الخوف من المستقبل.. الخوف من انه في يوم مايلاقيش شغلانة يقدر يعول بيها نفسه أو أهله.. أو الخوف من انه يخسر الوظيفة اللي هي مصدر رزقه حاليا.. فبتكون النتيجة ايه.. ان الواحد يعيش ماشي جنب الحيط.. و أحيانا جوة الحيط.. يبتعد تماما عن أي حاجة فيها أي نسبة مغامرة.. أومخاطرة.. أو تضحية.. حتى و إن كان وراها فائدة أعظم من الشئ اللي هاتضحي بيه..
الناس عادة في الظروف دي بتتصرف ازاي؟.. كل واحد بيقفل على نفسه بابه.. و يقولك "يا عم نفسي".. مصلحتي و مصلحة عيالي.. و من بعدي الطوفان..
كل شخص بيميل لأنه يستقل بذاته تماما.. يعيش في جزيرة لوحده.. لما أصبحت الأمة عبارة عن جزر متنائية عن بعضها و ماحدش حاسس بحد.. و اصبح مفهوم الأخوة في الله و التكافل في حس الناس مفهوم مثالي مبالغ فيه.. ولا يصلح للتطبيق في الواقع..
طيب.. في الظروف دي.. ايه القانون اللي ربنا سبحانه و تعالى ثبته و حكم بيه النفوس المجتمعات؟..
القانون ببساطة هو ان الناس مايقدروش يعيشوا في عزلة عن بعضهم.. و لكن الكون كله بيعمل في تكافل و تعاون.. مش بين البشر بس..
شوف حديث النبي"ص" : " مثل المؤمنين في توادهم وتراحمهم وتعاطفهم كمثل الجسد الواحد إذا اشتكى منه عضو تداعى له سائر الجسد بالحمى والسهر".. و قال "ص" : " المؤمن للمؤمن كالبنيان يشد بعضه بعضاً وشبك بين أصابعه"
دي الصورة اللي ارتضاها الله سبحانه و تعالى للبشر.. الجسد الواحد..

2- تعجل الحصول على النتائج دون بذل الأسباب:
"أنا عاوز كل حاجة.. و دلوقت حالا"..
كان فيه زمان إعلان بيجي في التلفزيون.. و كالعادة إعلاناتنا تقريبا مابتخرجش عن 3 حاجات.. اللبان.. السمنة.. مسحوق الغسيل
الإعلان ده أعتقد كتير جدا هايفتكروه.. كان عبارة عن كارتون.. لطفل صغير.. عمال يزعق.. و يقول "عاوز لبان أنا عاوزه الآن"..
الصورة مضحكة جدا.. لكن المؤلم ان ده حال أغلب الناس دلوقت.. طبعا ما اقصدش اللبان في حد ذاته .. و لكن قصدي.. على حتة "عاوزه الآن"..
عاوز كل حاجة.. الوظيفة و الفلوس و الشقة و العروسة و الفيلا و العربية و تلفزيون 12 قدم و تلاجة 12 راكب.. الخ..
لحد دلوقت.. هو فيه مشاكل.. بس تعالى نفترض ان مافيش مشكلة في الحاجات دي كلها..
طب ايه اللي تاعب الناس؟.. اللي تاعبهم.. انهم ببساطة عاوزين كل الحاجات دي.. بدون مقابل
و دلوقت حالا..
وسبحان الله.. في زماننا بقى سهل جدا انك تشتري الحاجة.. و تدفع بعدين.. تقسيط مريح.. يعني الحاجة عمرها الافتراضي ينتهي. والراجل يموت.. واولاده لسه بيدفعوا الأقساط!

طب ايه القانون.. أو سنة الله الكونية.. اللي بتحكم الوضع ده..القانون ببساطة.. هو.. زرع.. حصد.. عشان تحصد.. لازم الأول تزرع.. وتراعي.. وتتعب.. و تصبر..
اللي بيدور على وظيفة.. ببساطة شديدة جدا.. مش هاتلاقي اللي بتدور عليه.. إلا لما توفر في نفسك اللي أصحاب الوظائف بيدوروا عليه.. ألا و هو الخبرة و الإتقان.. هما دول واسطتك في زماننا ده..
اللي بيشتكوا و بيتحججوا بالواسطة.. ببساطة.. الواسطة مابتشتغلش غي في القطاع العام بس.. لأن ماحدش دافع حاجة من جيبه.. و اللي عاوز يشتغل في القطاع العام.. ببساطة مش عاوز يشتغل اصلا.. و لكن عشان نكون صدقين.. عاوز مكتب.. و مرتب آخر الشهر.. و طول الشهر.. جرايد.. و شاي و قهوة.. و فوت علينا بكرة يا سيد..!
انما اللي عاوز يشتغل.. لازم يطور نفسه.. و يتقن تخصصه.. لازم يكون متميز.. لأن أي صاحب شركة. مادام هايدفعلك مرتب.. محتاج منك مقابل.. و كل ماوفرتله مقابل متميز.. كل مالقيت الفرص قدامك أكتر و أكبر..لأن المتقنين في أمتنا بقوا أندر من الماء في رمال الصحراء.. فالمجال مفتوح أمام الجميع.. لمن يحب
أما اللي بيدور على الشقة و العربية و غيره و غيره..
ففي مثل بسيط جدا.. قالوه أهلنا زمان.. "اللي معاهوش.. مايلزموش".. If you can't afford it, You really don't need it
سبحان الله.. الحقيقة الواحد بيصعب عليه ناس.. تضيع عمرها.. و تعبها.. عشان تلاجة والا تلفزيون والا موبايل.. هل الحاجات دي فعلا تسوى عمرك اللي هاتضيعه عشانها؟ ..
زرع... حصد.. لو ماتقدرش تشتري الحاجة اللي بتحلم بيها دي.. محتاج راجع حساباتك .. هل انت فعلا محتاجها؟.. و هل تقدر تعيش من غيرها؟.. لو تقدر تعيش من غيرها.. يبقى انت مش محتاجها .. و لو محتاجها.. يكفيك اقل حاجة تؤدي الغرض.... انما للأسف.. الإعلانات غسلت عقول الناس.. فصورتلهم الرفاهية على انها أساسيات.. ماحدش يقدر يعيش من غيرها.. فزادت هموم الناس.. هما على هم..
حصد.. زرع..

3- فايروس "الضحية".. Victimitis ..دايما.. في أي وضع.. و في أي مشكلة.. هاتلاقي اصابع الاتهام.. و اللوم..
الكل يلوم الكل.. إلا نفسه.. في أي مشكلة.. تلاقي الكل يقولك "ده انا غلبان والله".. ماليش ذنب.. ده فلان هو اللي عمل كذا و كذا..
نفسي اعرف مين "فلان " ده اللي مبهدل الدنيا كده!..
حجج..
كتير من اللي بيعانوا في شغلهم.. بسبب تقصير منهم.. مقتنعين تماما ان سبب معاناتهم هو ان صاحب الشركة أو المدير بتاعه "راجل مفتري"..
أو زي مابتشوف ببساطة.. الحكومة هي السبب في كل مشاكلنا.. انما احنا ملايكة..!
ثقافة تعليق الاتهامات على شماعات الغير.. جايز تريح الواحد..هو كدب على نفسه كدبة و صدقها.. ان مالوش ذنب في اللي بيحصل.. لكن هل المشكلة اتحلت في النهاية؟..
طب فين القانون؟.. القانون ببساطة هو قول النبي"ص" :"الكيس من دان نفسه"..
.. ان لو عاوز تحل المشكلة.. لازم تعترف بيها و تتحمل مسئوليتها.. و تسال نفسك ايه اللي تقدر تعمله عشان تحلها بنفسك...
مافيش مشكلة بتتحل لوحدها.. و ماحدش هايحللك مشاكلك.. لأن كل واحد عنده مايكفيه من المشاكل.. اللي بيدورلها على حد يلومه عليها

4- اليأس:التطور الطبيعي أو النتاج الطبيعي لثقافة التملص من المسئولية.. و القاء اللوم على الآخرين.. هو اليأس..و التشاؤم.. و سوء الظن.. الاستسلام للواقع.. مذهب "انا اللي يتجوز امي.. اقول له يا عمي و أمري لله!"..
بلاش تحلم.. بلاش يبقى عندك طموح.. عشان مايجيلكش احباط..
مشكلة بيعاني منها ناس كتير جدا في زماننا.. و الحل ببساطة.. قول النبي"ص" :"استعن بالله.. ولا تعجز".. المسلم مش عاجز طول مامعاه ربنا.. و لما تخلص كل السباب اللي في الدنيا.. برضه مابيعجزش.. لأن معاه أعظم سبب.. و هو الدعاء..

5- نفسي نفسي:
مفهوم خطير جدا في المجتمع.. ألا و هو "نفسي نفسي".. كل واحد بيدور على مصلحته هو أولا.. و "أولا" دي حسن ظن.. لأن دي معناها انه هايدور على مصلحة غيره "ثانيا".. انما الواقع بيقول ان الغالب بيدور على مصلحته مش "أولا".. لأ بيدور على مصلحته "وبس".. "أنا هايطلعلي كام في البيعة دي كلها!"..
أصبحنا بننظر للناس حوالينا.. كل الناس.. زمايلنا في الدراسة.. في العمل.. حتى القرايب و الأهل.. بننظر للآخرين على انهم "منافسين" لينا.. كل ماكسبوا أكتر.. كل ماخسرنا احنا أكتر.. نظرية ان الدنيا زي الكعكة.. كل ماغيرك أخد منها أكتر.. كل ما نصيبك منها قل..
صحيح الناس مابتبينش الحكاية دي.. و نظهر قدام بعض فرحانين لبعض و بنشجع بعض لما حد ربنا يكرمه و يوفقه في حاجة في حياته.. و لكن للأسف في كتير من الأحيان ده بيكون في الظاهر بس.. انما من جوة.. القلب بياكله الحسد..
طب فين القانون؟.. القانون هو.. ان الدنيا مش "كعكة" و هاتخلص.. لأن عطاء الله لا ينتهي.. و ربك يعطي من فضله من يشاء.. وما يشاء.. يبقى القانون هو.. الجأ لله.. و اساله مما في أيدي الناس.. و ابذل الأسباب.. و دفع الثمن.. يعطك.. انما واضح ان الحسد أسهل بكتير من الحاجات اللي فاتت دي كلها
يوم ما الإنسان قدر يعمل كده.. يوم ماقام مجتمع كالجسد الواحد.. قامت أعظم حضارة في التاريخ.. بدون أي مبالغة.. حضارة الإسلام..
و لو لسة عاوز تقول "نفسي نفسي".. ماتستعجلش عليها.. هاتقولها كتير في الآخرة..

6- نفسي حد يفهمني:
[size=2][i]من أهم احتياجات الإنسان.. احتياجه لأن الناس تفهمه.. تسمعه.. تحترمه.. و تقدره..
من أهم احتياجاته.. انه يحس ان له تأثير في الناس حواليه.. و ده غالبا بيتم عن طريق التواصل مع الآخرين.. الحوار.. اني اوصلهم فكرتي.. و رأيي.. بوضوح و اقدر اقنعهم بيها..
و لكن... فكر معايا كده.. مش شايف زيي برضه ان في أغلب حواراتنا اليومية.. الطرفين.. بدل مايسمعوا لبعض و يفهموا بعض.. كل واحد عامل نفسه بيسمع.. و لكن في الواقع هو مش سامع حاجة.. هو بيجهز الرد بتاعه!..
بداية التأثير الحقيقي في الآخرين.. هو لحظة ماتسمحلهم انهم يأثروا فيك..
ازاي يعني؟.. يعني لحظة مايحسوا انك سمعتهم.. و فهمتهم..انك بذلت مجهود في محاولة تفهم موقفهم و آرائهم بصدق و إخلاص..
القانون ببساطة.. لو عاوز الناس يفهموني.. و يسمعوني.. الموضوع ده له تمن.. و هو انس أسمعهم و افهمهم الأولmankoul

موضوع جميل جدا ..مع الاسف كل اللي انت كاتبه واقع .. (بس بالنسبه لموضوع ان احنا ملايكه و ان الحكومه هي السبب في مشاكلنا) انا ها تكلم علي مصر لانني معرفش ايه بيحصل في باقي الدول اوي .. بس في مصر السلب و النهب ماشي الله ينور تحت اشراف الحكومه و الحكومه بدل ما توفر ارض للشباب يعملو عليها مشاريع و يعمرو ال 80% الصحرا في البلد باعت 700الف متر مربع في سينا لواحد اجنبي علشان يعمل مشروع و المتر كان بخمسه جنيه و سبعين قرش.............. ماهو المفروض برضه الحكومه تساعد ولا ايه!!!!!!!