راح الرجال الي له الطيب ينسااق

سمـــوا :



الشارب اللّي طيّـره مـوس حـلاّق
قلّه زمانك راح ما عـاد لـك صيـب

هذا الزّمن كلّ ٍ علـى الملـط سبّـاق
ما عاد فيـه اليـوم فتـل الأشانيـب

راح الرّجال اللّي لها الطّيب ينسـاق
وقامـت تقلّـد للبنـات الرعابـيـب

يا حيف يا دنيا العنا خاطري ضـاق
بأسباب من يتبـع سلـوم الأجانيـب

يمشي على الموضه بلا دين واخلاق
يزعـم بقولـه للحضـاره مجاذيـب

كلّه عشان عيـون تلعـات الأعنـاق
ولا يميّـز بيـن طيـب وعذاريـب

عينه على الكشخه ويقول إنْه مذواق
ولا ذاق مرّ الوقت ولا شاف اصاعيب

همّه يحط الجـل ويصيـح مشتـاق
ويقول أنا شاعر وأنا قرم وصعيـب

وإليا زهمته وأنـت مبلـي ومنعـاق
والله أنْ يبطي ما فزع فزعة الذيـب

والله خساره ضمّتـه راعـي نيـاق
أرفـل ولاهـو وافـي ٍ بالمطاليـب

ودّك من اقصى القلب تكفخه بطـراق
يمكن يجنّب عن هل الشـر والعيـب

لكن صلاحـه عنـد وهّـاب الأرزاق
والمرجله قالوا تجي اوقـات وتغيـب

والعين ملّت شوفها اشكـال وارنـاق
في هالقنـاة التـي تبـث التعاجيـب

كل ّ ٍ ركز في البيت له ستّة اطبـاق
ولْشوفة المنكـر يسـوق التراحيـب

ما عاد يجذبهم سنـا ضـوح بـرّاق
ولا عاد يطربهـم رفيـع المراقيـب

وقلبي على شوف الزحازيـح تـوّاق
اللّي بنوا في المجد طيب ٍ على طيب

لكنّ راح اللّي لـه الطّيـب ينسـاق
وهذا زمـان امضيّعيـن المواجيـب

يا ربّ شمس الحق يبديلها اشـراق
وعقب الهماج اليوم تصفى المشاريب

واستثني الطّيب على بيـض الأوراق
لا عـم دام العلـم محفـوظ بالغيـب

احد ٍ يزيد الجرح فـي قربـه فتـاق
وأحد ٍ بقربه يبري الجـرح ويطيـب

للأسف ماعاد فيه رياييل عرب يتحلمون المسؤوليه وين طبع البداوه والخشونه والرجووله .. الله يثبتنا انشالله
وانشالله تعجبكم هالقصيده
اخوكم ..عز الخليج

ههههههههههههههههههههههههههههههههههه