رضينه الإحتلال بحجة التحرير
وشعلنه شموعنه وبغداد شعلوها
أنهضمنه..ومارضينه الإحتلال يفوت
وفوك المارضينه السرف مشوها
دعوني البارحة بحفلة عرس بغداد
دموع من الوطن للوطن دفعوها
وطن عّريس وعزوبية أمريكان
وبطايق زفتهه بالهمر ودوها
وكعدت لوحدي بشارع يصيح الغوث
وجه وبكصته اللجمات طبعوها
وجابوهه وأجت بس اشأجت بغداد
حته عيونهه من اللطم شلعوها
أجت بدلة عرسها البيضه دم و نار
النذال من الصدر للجعب شكوها
وبدل شدة ورد جابت بديهه دموع
ومن من ايدهه من الشعر جروها
ماجنهه بعرس جنهه بحفل تشييع
عالدبابه تمشي الحلوه جابوها
شفقات وخوذ من كل فصيله ولون
تنطيهم زلم وكبور ينطوها
فضوا جم بكاره بساحة التحرير
وقضية ساحة التحرير فضوها
وأجه العريّس محني وعمره ست آلاف
جي تنزف حضاره عيونه شدوها
كعد مكسور خاطر والظهر مكسور
من شاف العلم ساريته كسروها
يعاين عالحفل شو كلهه غربه الناس!
أجت وادم غرب والعرف طشوها
بس بغداد أجته وعرفته من بعيد
حضنهه وحضنته والدنيه بجوها
وحجتله شلون شعلوا بالمخيم نار
من سلبوا خدرهه وصاحوا أخذوها
شلون مسلبه يودونهه لتكساس
بس مو عالهزل عالدرع ودوها
شلون مجتفه وشلون عدهه أيتام
شلون الحسره تطلع من يشتموها
لطم وجهه العراق وصاح ياكرار
وينك ياعلي بغداد باكوها
ونزفت عينه دم ومن بجه شافوه
باصابع من رصاص عيونه طفوها
وخذوه جثه وبقت بغداد بس تصيح
مبارك بس حلقته وياي خلوها
وجابوا حلقه بس مو ذهب من حبال
صعدوا عالمنصه وبيهه شنقوها
صعدوا عالمننصه وبيهه شنقوها
06-24-2008, 06:46 PM
عــرس بغداد (( الى من كانت ........))
العرض العادي
