والله وإحترنا مع جحا

. . . والله احترنا

مع جحا كنا نقول عنو اهبل وعلى نياتو مع إنو كان معو حق

...............!

أن تكون لطيفاً، محباً، طيب القلب وأدمي بيقولو عنك ضعيف الشخصية وكلمة بتاخدك وكلمة بتجيبك .... بتقوم بتغير فكرك وبتقوي شخصيتك وبتقلب وجك عالمقلوب، بيقولو عنك لئيم، متكبر وطمبوز

أن تقنع بما قسمه الله لك في الحياة وتكون عايش مبسوط وراضي بيقولو عنك ما عندك طموح، وما بتحب المجازفة واللي ما بيرمي حالو بالمهوار ما بيوصل لأنو إذا ما جربت كيف بدك تنجح ؟.... بتقوم بتحارب وبتقلب الدنيا رأساً على عقب لتلاقي شي أفضل وتحسن من وضعك بيقولو عنك طماع و عينك فارغة ويا لطيف ;كل الدنيه ما بتشبعو

أن تكون كريماً وحاضر لمد يد المساعدة لأخيك الأنسان والمحتاج والمقهور بيقولو عنك مصلحجي وعم يستغل الناس وأكيد بدو شي بالمقابل، شو هو عم يخدم الناس على سواد عيونها ؟.... بتغير بحالك، وبتعمل ديني من طين وديني من عجين ومبتعود تسمع، وبتقول إذا دينت صاحبك بتخسرو، بيقولو عنك بخيل وجاحظ وقلبك من حجر

أن لا تتدخل بامور الناس وفي ما لا يعنيك، وتحفظ لسانك ورأيك وكافي الكرة الأرضية خيرك وشرك بيقولو وحداني، وكلو عقد نفسية لازم فكها عالسريع.... بتنفتح عالناس وبتسأل عن حالهن وأحوالهن واخبارهن بيقولو عنك حشور وفضولي وبدك تعرف البيضة مين باضها

أن لا تثق بالحب لأنك ملدوع وبعدو جلدك ملطوع وقاعد ناطر حتى يروق بدنك من أثر الخبطة، بيقولو عامل حالو مطووش وطالع من تجربة وهو يمكن في ألف علة ما حدا عم يتطلع فيه أصلاً وعم يتدلل.... طيب بتقوم بتعرض حالك وعضلاتك وبتحط أخبار أنك جاهز وحاضر وحاطط عقلك براسك بيقولو عم يدلل على حالو أكيد بيشكي من شي مصيبة وبضاعة مخروبة

أنك تكون موظف مسووءل وعندك ضمير بيقولو عنك عم بتمسح جوخ وعينك عالترقية... ما تعمل شي بيقولو عم يقبض وهو قاعد ويمكن المدير أبن عمو

أنك تكون ملتزم بحضارتك ودينك وبتخاف من اللي خلقك بيقولو دقة قديمة ومنك متحضر .. بتلحلحها شوي بيقولو نسي حالو من وين جايي ومفكر شروال أبو معلق بهارفرد

أنك تحب وحدتك ومبعد عن البشرية، ومتل ما كان يقول جدي "راحتي في وحدتي"، بيقولو أيه ما بيسوا لأنو الجنة بلا ناس ما بتنداس .. بتنفتح عالناس وبتصير اجتماعي وترداد المحلات اللي فيها بتنشاف وبتشوف، بيقولو سعادتك وراحتك وانبساطك لازم ينبعو من الداخل مش من الناس ومش ضروري تكون محاوط حالك باصحابك

فعشان هيك من الاخر لو حدن بيحكي شي عنك بوجهك شو بتحكيلو اطلع من راسي أحسن شي ..!!
ههههههههههههههههههههههههههههههههههههههه
إرضاء الناس غايه لاتدرك وإرضاء النفس غايه لا تشبع
تحياتي
baby lebanon

يسلموووو على الموضوع الجميييل
تقبلي مروري

هههههههههه

مشكوره على الطرح الرائع منك بيبى

الله يعطيك العافيه

الله يعافيكم يسلمو للمرور جميعا ..